Víðavangshlaup ÍR

Það var árið 1916 að ÍR-ingar stofnuðu til víðavangshlaups að enskri fyrirmynd. Hlaupið hefur verið haldið árlega síðan og mun vera sá íþróttaviðburður hér á landi sem á sér lengsta samfellda sögu. Helgi Jónasson í Brennu var í fararbroddi þeirra ÍR-inga og stjórnaði fyrstu hlaupunum. Hlaupið varð strax einn af meginviðburðum í dagskrá sumardagsins fyrsta í Reykjavík. Hlaupaleiðin hefur jafnan verið tengd miðbæ Reykjavíkur þó hlaupaleiðin hafi breyst alloft og einnig aðstaða öll í miðbænum. Nú er ekki mikinn víðavangs að finna á þeim slóðum og er hlaupið í dag á malbikuðum stígum og götum. Það hefur jafnan þótt mikill sigur að koma fyrstur í mark í Víðavangshlaupi ÍR. Oftast hefur Ágúst Ásgeirsson ÍR sigrað í þessu sögufræga hlaupi, eða átt sinnum alls. Næstur honum kemur Sigmar Gunnarsson UMSB með sjö sigra. Undir stjórn Guðmundar Þórarinssonar jókst þátttaka mjög í Víðavangshlaupi ÍR á áttunda áratugnum og þá tóku konur fyrst þátt. Fyrsti sigurvegari kvenna var Lilja Guðmundsdóttir ÍR en næstu 5 ár sigraði Ragnhildur Pálsdóttir UMSK/KR. Martha Ernstsdóttir ÍR hefur unnið flesta sigra í kvennaflokki en átta sinnum hefur hún verið fyrsta konan í mark í Víðavangshlaupi ÍR.

Fyrsta hlaupið 1916

Fyrsta Víðavangshlaup ÍR hófst við Austurvöll á sumardaginn fyrsta sem bar upp á skírdag. Hlaupið var suður Tjarnargötu og yfir mýrina sunnan við Tjörnina, eftir Laufásvegi og inn að Hlíð. Þaðan var haldið yfir tún og út á Laugaveg á móts við Gasstöðina, niður Laugaveg og hlaupið endaði í Austurstræti á móts við Pósthúsið.
Þátttakendur voru 9 og sigurvegarinn var Jón Kaldal Jónsson myndsmíðanemi, annar Ólafur Sveinsson prentari og þriðji Ottó Bj. Arnar símritari. Múgur og margmenni var samankominn við Austurvöll til þess að horfa á hlaupið.

Tíunda hlaupið 1925

Nú voru hlauparar 20 og hlaupaleiðin sú sama og í fyrri hlaupum. Tekið er fram í blöðum að færðin hafi verið slæm á Laufásveginum en batnaði er á leið skeiðið. Hallgrímur Jónsson Ármanni kom fyrstur í mark, Geir Gígja KR varð annar og þriðji Magnús Eiríksson. Magnús keppti fyrir Íþróttafélag Kjósarsýslu og unnu ÍK menn sveitakeppnina og Hjaltestedbikarinn. Hlaupararnir komu allir að marki og voru lítið þrekaðir að sjeð varð, og var þeim heilsað með miklum fögnuði af áhorfendum segir í Morgunblaðinu í frétt af hlaupinu.

Tuttugasta hlaupið 1935

Þátttakendur í þessu afmælishlaupi voru 15 og voru Borgfirðingar fjölmennir. Þeir höfðu sigur í sveitakeppninni og unnu þar með Morgunblaðsbikarinn. Sigurvegari var Gísli Albertsson frá Hesti.

Þrítugasta hlaupið 1945

Fyrstur að marki var Haraldur Björnsson KR eftir mikla keppni við Óskar Jónsson ÍR sem varð annar og þriðji varð Hörður Hafliðason Á. Hlaupaleiðinni hafði verð breytt nokkuð. Hlaupið endaði á þessum árum í Lækjargötu eða Fríkirkjuvegi til að hlaupararnir þurfi sem minnst að hlaupa á malbikuðum vegi og eins til að fyrirbyggja eins mikla þröng meðal áhorfenda. Í þessu afmælishlaupi hófst hlaupið uppi á Öskjuhlíð og lauk fyrir framan Miðbæjarbarnaskólann, um 4,1 km að lengd. Jón Kaldal, sigurvegari í fyrsta hlaupinu og einn mesti afreksmaður Íslands í langhlaupum flutti erindi um víðavangshlaup í útvarpi þennan dag og hvatti til að víðavangshlaup yrðu iðkuð um land allt.

Fertugasta hlaupið 1955

Til leiks mættu 24 hlauparar og luku allir keppni. Hlaupið hófst og því lauk í Hljómskálagarðinum. Sigurvegari varð Svavar Markússon KR. Kristján Jóhannsson ÍR varð nú annar en hann hafði sigrað þrjú árin á undan. Þriðji varð Stefán Árnason Á. ÍR sigraði í 3ja og 5 manna sveitakeppni. Stjórn ÍR hélt keppendum, starfsmönnum og ýmsum forystumönnum íþróttahreyfingarinna kaffisamsæti eftir hlaupið. Jakob Hafstein formaður ÍR veitti verðlaun og voru verðlaun sérstaklega glæsileg í þessu afmærlishlaupi. Meðal þeirra sem héldu ræður voru Benedikt Waage, formaður ÍSÍ, Brynjólfur Ingólfsson formaður FRÍ, Björn Ólafsson fyrrv. ráðherra, Erlendur Ó. Pétursson formaður KR, Jens Guðbjörnsson formaður Ármanns og Jón Stefánsson formaru UMSE.

Fimmtugasta hlaupið 1965

Samkvæmt frétt í Morgunblaðinu horfðu þúsundir manna á þetta afmælishlaup en keppendur voru 33 og luku allir keppni. Hlaupið hófst vestanvert í Hljómskálagarðinum og hlaupið var um garðinn og vestur að prófessorabústöðunum um mýrina og aftur inn í garðinn og endaði hlaupið við Menntaskólann við Lækjargötu. Sigurvegari var Kristleifur Guðbjörnsson KR, annar Agnar Levý KR og þriðji Halldór Guðbjörnsson KR, bróðir Kristleifs.

Sextugasta hlaupið 1975

Sigfús Jónsson ÍR sigraði í þessu sextugasta Víðavagnshlaupi ÍR og í kvennaflokki Ragnhildur Pálsdóttir UMSK. Sigfús hafði árin á undan þurft að láta í minni pokann fyrir félaga sínum Ágústi Ásgeirssyni en nú sigraði Sigfús af miklu öryggi á undan þeim Jóni Diðrikssyni UMSB og Ágústi Ásgeirssyni ÍR. Hlaupið hófst í Hljómskálagarðinum við Skothúsveg. Hlaupið var yfir Hringbrautina og yfir í Vatnsmýrina. Á bakaleiðnni var hlaupið norður Tjarnargötu yfir Vonarstræti og inn í Aðalstræti og lauk hlaupinu í Austurstræti, um 4,2 km leið. Alls luku 56 hlauparar keppni, þar af 9 konur.

Sjötugasta hlaupið 1985

Sigurður Pétur Sigmundsson FH, Íslandsmetahafinn í maraþonhlaupi, sigraði í þessu 70. Víðavangshlaupi ÍR. Í öðru sæti varð Jón Diðriksson FH og Hafsteinn Óskarsson ÍR í þriðja sæti. Í kvennaflokki kom Hrönn Guðmundsdóttir ÍR fyrst í mark. Metþátttaka var í hlaupinu er 94 hlauparar luku keppni. Hlaupaleiðin var í stórum dráttum sú sama og tíðkaðist á þessum árum. Hlaupið hófst í Hljómskálagarðinum, hlaupinn var hringur um Vatnsmýrina, komið aftur inn í Hljómskálagarðinn og að þessu sinni var endaspretturinn í Tjarnargötunni.

Áttugasta hlaupið 1995

Borgfirðingurinn Sigmar Gunnarsson sigraði í 80. Víðavangshlaupi ÍR en í öðru sæti varð Gunnlaugur Skúlason UMSS, sigurvegarinn frá 75. hlaupinu. Í þriðja sæti varð Daníel Smári Guðmundsson Á. Í kvennaflokki sigraði Anna Jeeves ÍR og var þetta hennar þriðji sigur í röð. Metþáttaka var í afmælishlaupinu er 284 hlauparar luku keppni.

Nítugasta hlaupið 2005

Aðstæður voru mjög góðar í 90. Víðavangshlaupi ÍR þetta árið en 200 þátttakendur luku keppni. Kári Steinn Karlsson UMSS sigraði í hlaupinu, hans fyrsti sigur Víðavangshlaupi ÍR. Í kvennaflokki vann Íris Anna Skúladóttir Fjölni sinn annan sigur í hlaupinu.

Sigurvegarar í Víðavangshlaupi ÍR frá upphafi
Ár	Karlar		Konur
1916	Jón J.Kaldal	ÍR
1917	Jón J.Kaldal	ÍR
1918	Ólafur Sveinsson	ÍR
1919	Ólafur Sveinsson	ÍR
1920	Þorgils Guðmundsson	UMFA og D
1921	Guðjón Júlíusson	UMFA og D
1922	Guðjón Júlíusson	UMFA og D
1923	Guðjón Júlíusson	UMFA og D
1924	Geir Gígja	KR
1925	Hallgrímur Jónsson	Á
1926	Geir Gígja	KR
1927	Geir Gígja	KR
1928	Geir Gígja	KR
1929	Jón Þórðarson	KR
1930	Viggó Jónsson	GR
1931	Oddgeir Sveinsson	KR
1932	Gísli Finnsson	KV
1933	Bjarni Bjarnason	ÍB
1934	Bjarni Bjarnason	ÍB
1935	Gísli Albertsson	ÍB
1936	Sverrir Jóhannsesson	KR
1937	Sverrir Jóhannsesson	KR
1938	Sverrir Jóhannsesson	KR
1939	Sverrir Jóhannsesson	KR
1940	Haraldur Þórðarson	Stj.Dals.
1941	Óskar Á. Sigðursson	KR
1942	Sigurgeir Ársælsson	Á
1943	Haraldur Þórðarsson	Á
1944	Sigurgeir Ársælsson	Á
1945	Haraldur Björnsson	KR
1946	Þórður Þorgeirsson	KR
1947	Þórður Þorgeirsson	KR
1948	Stefán Guðmundsson	Á
1949	Stefán Guðmundsson	Á
1950	Stefán Guðmundsson	Á
1951	Stefán Guðmundsson	Á
1952	Kristján Jóhannsson	ÍR
1953	Kristján Jóhannsson	ÍR
1954	Kristján Jóhannsson	UMSE
1955	Svavar Markússon	KR
1956	Stefán Árnason	UMSE
1957	Kristján Jóhannsson	ÍR
1958	Haukur Engilbertsson	UMSB
1959	Haukur Engilbertsson	UMSB
1960	Kristleifur Guðbjörnsson	KR
1961	Kristleifur Guðbjörnsson	KR
1962	Kristleifur Guðbjörnsson	KR
1963	Kristleifur Guðbjörnsson	KR
1964	Þórarinn Arnórsson	ÍR
1965	Kristleifur Guðbjörnsson	KR
1966	Halldór Guðbjörnsson	KR
1967	Halldór Guðbjörnsson	KR
1968	Örn Agnarsson	UÍA
1969	Þórður Guðmundsson	UBK
1970	Halldór Guðbjörnsson	KR
1971	Halldór Guðbjörnsson	KR	Lilja Guðmundsdóttir	ÍR
1972	Ágúst Ásgeirsson	ÍR	Ragnhildur Pálsdóttir	UMSK
1973	Ágúst Ásgeirsson	ÍR	Ragnhildur Pálsdóttir	UMSK
1974	Ágúst Ásgeirsson	ÍR	Ragnhildur Pálsdóttir	UMSK
1975	Sigfús Jónsson	ÍR	Ragnhildur Pálsdóttir	UMSK
1976	Ágúst Ásgeirsson	ÍR	Ragnhildur Pálsdóttir	KR
1977	Ágúst Ásgeirsson	ÍR	Thelma Björnsdóttir	UBK
1978	Jón Diðriksson	UMSB	Thelma Björnsdóttir	UBK
1979	Ágúst Ásgeirsson	ÍR	Thelma Björnsdóttir	UBK
1980	Ágúst Þorsteinsson	UMSB	Guðrún Karlsdóttir	UBK
1981	Ágúst Ásgeirsson	ÍR	Guðrún Karlsdóttir	UBK
1982	Gunnar Páll Jóakimsson	ÍR	Hrönn Guðmundsdóttir	UBK
1983	Hafsteinn Óskarsson	ÍR	Ragnheiður Ólafsdóttir	FH
1984	Sigurður P. Sigmundsson	FH	Unnur Stefánsdóttir	HSK
1985	Sigurður P. Sigmundsson	FH	Hrönn Guðmundsdóttir	ÍR
1986	Jón Diðriksson	FH	Martha Ernstsdóttir	Á
1987	Már Hermannsson	UMFK	Steinunn Jónsdóttir	Á
1988	Jóhann Ingibergsson	FH	Martha Ernstsdóttir	ÍR
1989	Már Hermannsson	UMFK	Martha Ernstsdóttir	ÍR
1990	Gunnlaugur Skúlason	UMSS	Martha Ernstsdóttir	ÍR
1991	Toby Tanser	GBR	Martha Ernstsdóttir	ÍR
1992	Toby Tanser	KR	Hulda Pálsdóttir	ÍR
1993	Sigmar Gunnarsson	UMSB	Anna Jeeves	ÍR
1994	Sigmar Gunnarsson	UMSB	Anna Jeeves	ÍR
1995	Sigmar Gunnarsson	UMSB	Anna Jeeves	ÍR
1996	Sigmar Gunnarsson	UMSB	Laufey Stefánsdóttir	FH
1997	Sigmar Gunnarsson	UMSB	Bryndís Ernstsdóttir	ÍR
1998	Sigmar Gunnarsson	UMSB	Marha Ernstsdóttir	ÍR
1999	Sveinn Margeirsson	UMFT	Anna Jeeves	ÍR
2000	Daníel Smári Guðmundsson	ÍR	Fríða Rún Þórðardóttir	ÍR
2001	Sveinn Ernstsson	ÍR	Marhta Ernstsdóttir	ÍR
2002	Sveinn Margeirsson	UMFT	Rannveig Oddsdóttir	LR
2003	Björn Margeirsson	Breiðablik	Martha Ernstsdóttir	ÍR
2004	Björn Margeirsson	FH	Íris Anna Skúladóttir	Fjölnir
2005	Kári Steinn Karlsson	UMSS	Íris Anna Skúladóttir	Fjölnir
2006	Kári Steinn Karlsson	Breiðablik	Krisjana Ósk Krisjánsdóttir Howard	ÍR
2007	Kári Steinn Karlsson	Breiðablik	Íris Anna Skúladóttir	Fjölnir
2008	Þorbergur Ingi Jónsson	Breiðablik	Arndís Ýr Hafþórsdóttir	Fjölnir
2009	Karoly Varga	FH	Arndís Ýr Hafþórsdóttir	Fjölnir
2010

Um hlaupið á Hlaup.is

Viðburðir í frjálsum

---