Bætingar í Daegu í Suður-Kóreu

Átta ungmenni á aldrinum 14-15 ára tóku dagana 12.-17. júlí þátt í International Children´s Games eða Alþjóðaleikum ungmenna sem fram fór í Daegu í Suður-Kóreu. Að þessu sinni bauð Reykjavíkurborg 4 sundkrökkum og 4 frjálsíþróttakrökkum á leikana. Frjálsíþróttakrakkarnir eru Hanna Þráinsdóttir, Sævar Hlíðkvist Kristmarsson og Thelma Lind Kristjánsdóttir öll úr ÍR ásamt Viktori Orra Péturssyni úr Ármanni. Þjálfari hópsins er Hörður Grétar Gunnarsson þjálfari hjá ÍR.

Thelma Lind komst í úrslit í langstökki og lenti í 3. sæti með stökki upp á 5,40 m sem er bæting hjá henni. Thelma Lind var í öðru sæti fram að næst síðasta stökki keppninnar en þá stökk stúlka frá Skotlandi 5,42 m og komst upp í annað sætið. Thelma Lind keppti einnig í 100m hlaupi og komst í B-úrslit þar sem hún varð í 3. sæti á tímanum 13,22 sek. Thelma hljóp best 13,19 sek. í undanriðlum.

Hanna Þráinsdóttir komst í úrslit í hástökki og lenti í 5.-6. sæti með stökki upp á 1,58 m sem er bæting hjá henni utanhúss. Hanna átti góðar tilraunir við 1,61 m en felldi mjög naumlega. Sú hæð hefði tryggt henni 3. sætið og bronsverðlaun. Þó má geta þess að stúlkurnar í 3.-6. sæti stukku allar sömu hæð eða 1,58 m.

Sævar Hlíðkvist Kristmarsson komst í úrslit í langstökki með stökki upp á 5,80 m sem er bæting hjá honum. Vegna magakveisu varð Sævar að sleppa úrslitunum. Sævar keppti einnig í 100m hlaupi og komst í B-úrslit þar sem hann varð í 5. sæti á tímanum 11,98 sek. sem er rétt við hans besta tíma sem er 11,97 sek.

Viktor Orri Pétursson komst í B-úrslit í 1500m hlaupi þar sem hann varð í 2. sæti á tímanum 4:45,86 mín. sem er aðeins frá hans besta tíma.

Sannarlega glæsilegur árangur hjá þessum ungu og efnilegu krökkum sem voru landi og þjóð til fyrirmyndar meðan á leikunum stóð og verður gaman að fylgjast með þeim á næstu árum.