Arna Stefanía kjörin íþróttakona ÍR

Kjör íþróttakarls og íþróttakonu ÍR fór fram í gær. Arna Stefanía Guðmundsdóttir var kjörin íþróttakona ÍR og keilumaðurinn Hafþór Harðarson var kjörinn íþróttakarl ÍR. 
Arna Stefanía  vann besta afrek frjálsíþróttakvenna ÍR  samkvæmt alþjóðlegri stigatöflu árið 2011 þegar hún hljóp 400m innanhúss á 54,73 sek. Það er jafnframt þriðji besti árangur íslenskrar konu í þeirri grein frá upphafi. Hún vann til bronsverðlauna á Norðurlandamóti unglinga í sjöþraut í flokki 16-17 ára með 5337 stig. Keppti á Heimsmeistaramóti 17 ára og yngri í sjöþraut og var þar í baráttu 10 bestu lengst af en varð að sætta sig við 21. sæti af 40 keppendum eftir misheppnað langstökk í þrautinni. Arna hafnaði í 9.sæti í 400m hlaupi á Ólympíudögum Evrópuæskunnar í Tyrklandi. Varð fjórða á Norðurlandamóti unglinga í sömu grein og setti glæsileg Íslandsmet bæði innanhúss og utan í 400m hlaupum í flokki 16-17 ára.
Arna Stefanía hljóp í Íslandsmetssveit ÍR í 4x200m boðhlaupi innanhúss. Þó Arna sé ung að árum þá gegndi hún mjög stóru hlutverki í yfirburða sigrum ÍR í Bikarkeppni FRÍ innanhúss og utan og í sigrum 15-22 ára liðs ÍR á Íslandsmeistaramótunum bæði innanhúss og utan. Arna býr sig nú af kappi undir þátttöku í Heimsmeistaramóti unglinga 19 ára og yngri í sjöþraut árið 2012.
Við erum ákaflega stolt af okkar konu og óskum henni til hamingju með titilinn Íþróttakona ÍR 2011.