Sigurhátíð Frjálsíþróttadeildar ÍR

Iðkendur Frjálsíþróttadeildar ÍR hafa  náð þeim stórkostlega árangri í ár að vera Íslandsmeistarar félagsliða árið 2010 í öllum aldursflokkum utanhúss og inn ásamt því að vera bikarmeistarar í frjálsíþróttum utanhúss og inna og bikarmeistarar 16 ára og yngri. Frjálsíþróttafólkið í ÍR hefur með öðrum orðum unnið alla stóru titlana sem í boði eru hérlendis í sinni íþróttagrein. Þetta hefur ekkert félag gert áður.

Árangur sem þessi verður ekki til á einni nóttu. Hann er afrakstur mikillar vinnu fjölmargra einstaklinga með þjálfarana í broddi fylkingar. Þessi uppbygging hófst fyrir 10 árum og síðan þá hefur markvisst verið unnið að því að hlúa vel að iðkendum. Allir hafa tekið virkan þátt og lagt sig fram um að starfið í deildinni væri jákvætt og gefandi fyrir alla sem taka þátt. Frjálsíþróttadeild ÍR er stórt og mikið „þorp" sem heldur vel utan um börnin sín. Það skilar árangri ekki bara á íþróttasviðinu

Í tilefni af þessu einstaka árangri mun deildin halda sigurhátíð í ÍR-heimilinu fimmtudaginn 26. ágúst kl. 20.00. Öllum iðkendum og þjálfurum ásamt fjölskyldum þeirra er boðið til hátíðarinnar, ásamt öllum þeim fjölmörgu sem leggja deildinni lið með einum eða öðrum hætti. Hittumst öll í sigurskapi og rifjum upp góðar minningar, skoðum myndir og gleðjumst saman.
Stjórn Frjálsíþróttadeildar ÍR