Evrópukeppnin á morgun, sunnudag

Tómas, Arnar, Reynir og Tobbi búa sig nú undir Evrópukeppnina í Víðavangshlaupum í Castellon á Spáni. Þeir flugu út í gær en fengu ekki farangurinn fyrr en í dag og tóku þá létta æfingu og litu á aðstæður.Brautin er rennislétt en með mikið af hlykkjum og beygjum, mest harðir malarstígar en einnig mjúkir skógarstígar.  Í Castellon er frekar kalt og vindur, en ekkert sem slær strákana okkar út af laginu. Þetta er frumraun þeirra í svona keppni nema Tobba og við fylgjumst með þeim og birtum úrslit hér á síðunni á morgun, sunnudag.

 

MÍ 15 - 22 ára - frábær fyrri dagur - 15 Íslandsmeistaratitlar til ÍR

Meistaramót Íslands 15 - 22 ára fer fram í Laugardalshöll um helgina. ÍR- ingar eiga titil að verja og það eru 67 vaskir ÍR-ingar sem mættu til leiks í morgun staðráðnir í að verja þann titil.
Fjölmargir ÍR-ingar voru á verðlaunapalli á fyrra degi mótsins og 15 ÍR- ingar unnu til Íslandsmeistaratitils.
Eftir fyrri daginn leiða ÍR- ingar stigakeppni félaganna í 5 aldursflokkum af 8 og í heildarstigakeppninni leiða ÍR - ingar með 229,8 stig í fyrsta sæti en Breiðablik er í öðru sæti með 96,5 stig.
ÍR-ingar sjá um framkvæmd mótsins og í dag voru 48 sjálfboðaliðar sem framkvæmdu mótið sem gekk ákaflega vel enda valinn maður í hverju rúmi.
Með því að smella á meira má sjá árangur þeirra ÍR-inga sem stigu á verðlaunapallinn í dag.

ÍR ingar í Evrópukeppni

ÍR-ingar senda lið í Evrópukeppni félagsliða í víðavangshlaupum en ÍR á keppnisréttinn sem ríkjandi Íslandsmeistarar. Keppnin fer fram í Castellon á Spáni 5. febrúar. Þeir sem skipa liðið eru: Reynir Bjarni Egilsson, Arnar Pétursson, Þorbergur Ingi Jónsson og Tómas Zoega. Þess má geta að ÍR tók þátt fyrst íslenskra liða í þessari keppni 1976 en þá fór keppnin einnig fram á Spáni.

Stórmót ÍR - frábæru móti lokið - nýtt Íslandsmet í 400 m hlaupi karla

16. Stórmóti ÍR lauk í dag. Hápunktar mótsins voru nýtt Íslandsmet í 400 m hlaupi karla og Færeyjamet í þrístökki karla. Trausti Stefánsson úr FH setti Íslandsmetið í  400 m hlaupinu en hann kom í mark á 48,23 sekúndum eftir hörku keppni við Ívar Jasonarson ÍR sem kom í mark á 48,53 sekúndum. Össur Debes Eiriksfoss setti Færeyjamet í þrístökki þegar hann stökk 14,05 m og vann þrístökkið. Tvö aldursflokkamet litu einnig dagsins ljós á mótinu en þau settu Hilmar Örn Jónsson ÍR í flokki 16 til 17 ára pilta þegar hann varpaði kúlunni 16,28 m og Þórdís Eva Steinsdóttir FH þegar hún hljóp 600 m á 1:46,36 mínútum. 
ÍR - ingar unnu til fjölmargra verðlauna og margar persónulegar bætingar litu dagsins ljós.

Stórmót ÍR - frábær fyrri dagur

Það voru 776 keppendur frá 23 félögum skráðir til leiks þegar 16. Stórmót ÍR var sett kl. 9 í morgun. Í byrjun dags var keppt á 28 stöðum samtímis í báðum sölum Laugardalshallar. Það voru ræstir samtals 130 riðlar í hlaupum og um 80 sjálfboðaliðar lögðu sitt af mörkum margir allan daginn.
Um 140 krakkar 10 ára og yngri spreyttu sig í hinum ýmsu greinum í fjölþraut barana. Þar mátti sjá gleði í hverju andliti og ekki vantaði keppnisskaðið í unga fólkið. Það tóku allir stoltir á móti sinni viðurkenningu í lok þrautarinnar.
Fjölmargir ÍR - ingar unnur til verðlauna og margir sigruðu í sinni grein. Enn fleiri bættu sinn besta árangur. Hranfhild Eir Hermóðsdóttir sló mótsmet í 60 m hlaupi þegar hún hljóp á 7,69 sekúndum. Þessi tími er 7 besti tími sem íslensk kona hefur náð.
Öll úrslit mótsins má sjá í mótaforriti FRÍ.
Mótið heldur áfram á morgun og hefst þá kl. 10 og stendur til 16:30.

Skráningarfrestur framlengdur á Stórmóti ÍR

Þar sem erfiðleikar voru í skráningu á Stórmót ÍR í gærkvöldi var skráningarfestur framlengdur til kl 18. í dag.
Nú þegar eru ríflega 700 keppendur  frá 22 félögum og sérsamböndum skráðir til leiks og þar af eru 181 frá ÍR. Vinir okkar í Færeyjum koma með 47 manna lið á mótið og þeim hefur fjölgað ár frá ári.
Mót af þessari stærð krefst gríðarlega mikils undirbúnings og fjölda fólks til að framkvæma mótið. Þessa vinnu framkvæma sjálfboðaliðar úr röðum foreldra, iðkenda, þjálfara og velunnara deildarinnar með þeim hætti að mótin okkar hafa vaxið og dafnað ár frá ári og greinilegt að þau eru orðin einn af föstu punktunum í tilveru þeirra sem æfa frjálsar. Nú þegar hafa um 100 manns skráð sig til starfa og margir vinna alla helgina svo Stórmót ÍR rísi undir nafni og haldi áfram að vera fjölmennasta frjásírþóttamót ársins hér á landi.
Hvetjum alla til að kíkja við í höllinni og anda að sér stemningunni á fjölmennast frjálsíþróttamóti landsins.

Arna Stefanía kjörin íþróttakona ÍR

Kjör íþróttakarls og íþróttakonu ÍR fór fram í gær. Arna Stefanía Guðmundsdóttir var kjörin íþróttakona ÍR og keilumaðurinn Hafþór Harðarson var kjörinn íþróttakarl ÍR. 
Arna Stefanía  vann besta afrek frjálsíþróttakvenna ÍR  samkvæmt alþjóðlegri stigatöflu árið 2011 þegar hún hljóp 400m innanhúss á 54,73 sek. Það er jafnframt þriðji besti árangur íslenskrar konu í þeirri grein frá upphafi. Hún vann til bronsverðlauna á Norðurlandamóti unglinga í sjöþraut í flokki 16-17 ára með 5337 stig. Keppti á Heimsmeistaramóti 17 ára og yngri í sjöþraut og var þar í baráttu 10 bestu lengst af en varð að sætta sig við 21. sæti af 40 keppendum eftir misheppnað langstökk í þrautinni. Arna hafnaði í 9.sæti í 400m hlaupi á Ólympíudögum Evrópuæskunnar í Tyrklandi. Varð fjórða á Norðurlandamóti unglinga í sömu grein og setti glæsileg Íslandsmet bæði innanhúss og utan í 400m hlaupum í flokki 16-17 ára.