Arna Stefanía Íþróttakona ársins og Hafþór Harðarson Íþróttamaður ársins

Sunnudaginn 22.janúar var kjör á Íþróttamanni og Íþróttakonu ÍR fyrir árið 2011. Fyrir valinu varð frjálsíþróttakonan Arna Stefanía Guðmundsdóttir og keilumaðurinn Hafþór Harðarson.
Arna Stefanía vann m.a. besta afrek ÍR kvenna samkvæmt alþjóðlegri stigatöflu árið 2011 þegar hún hljóp 400 m. innanhúss á 54,73 sek., en það er jafnframt þriðji besti árangur íslenskrar konu í þeirri grein frá upphafi. Arna Stefanía hefur m.a. keppt á Norðurlandamóti unglinga og Heimsmeistaramóti 17 ára og yngri.
Hafþór hefur m.a. afrekað að leika fullkominn keiluleik (300) alls tíu sinnum, náð bronsi á Heimsmeistaramóti ungmenna, unnið sér inn stig á stigalista Evrópska keilusambandsins, hlotið silfur á sænska meistaramótinu, unnið íslandsmeistaratitil einstaklinga í hópi fullorðinna o.fl.

RIG lokið, Aníta Hinriksdóttir stal senunni með nýtt Íslandsmet í 800m kvenna

RIG er lauk nú síðdegis og má segja að Aníta Hinriksdóttir 16 ára ÍR -ingur hafi stolið senunni með sínum glæsilega árangri þegar hún hljóp 800m á 2:05,96 mín og bætti Íslandsmet Lilju Guðmundsdóttur síðan í Turku í Finnlandi 26. febrúar 1977 en met Lilju var 2:09, 68 mín.Aðrir Íslendingar áttu frábæran dag og þar af sýndu margir ÍR-ingar góðan árangur og skemmtilegt keppnisskap. Átta mótsmet féllu og eitt annað Íslandsmet var sett en þar var á ferðinni Þórdís Eva Steinsdóttir FH sem sett met í 800m 13 ára telpna 2:25,37 mín og bætti gamla metið um 2 sekúndur.

Helga María í 8 sæti á Ólympíuleikum ungmenna.

Helga María Vilhjálmsdóttir hafnaði í 8. sæti á Vetrarólympíuleikum ungmenna í Innsbruck í Austurríki í dag en það er gríðarlega góður árangur. Keppendur voru alls 54 talsins frá 47 löndum.

Helga var þrátt fyrir þetta í vandræðum í fyrri ferðinni og var að henni lokinni í 14. sæti en hún skíðaði hratt og vel í síðari ferðinni og átti þá sjötta besta tímann. Tími Helgu í fyrri ferðinni var 45,63 sekúndur en í þeirri seinni 39,29 sekúndur.

Árangur Helgu er sá besti sem Íslendingur hefur náð á Ólympíuleikum ungmenna.

Við hvetjum alla til að koma og prófa að æfa hjá okkur handbolta á meðan á EM í handbolta stendur.

Við hvetjum alla til að koma og prófa að æfa hjá okkur á meðan á EM í handbolta stendur eða næstu tvær vikurnar. Það kostar ekkert að prófa og þjálfarar okkar taka mjög vel á móti ykkur. Skoðið æfingatöflu hér að neðan og síðan er bara að mæta á næstu æfingu.
http://ir.is/media/PDF/Aefingatafla_Handknattleiksdeildar_1112.pdf
Hlökkum til að sjá ykkur á æfingu hjá okkur.
Kveðja ÍR Handbolti
Þú finnur okkur á Facebook

Kjör á Íþróttamanni og Íþróttakonu ÍR fyrir árið 2011

Sunnudaginn 22.janúar kl.13:00 fer fram kjör á íþróttamanni- og konu ÍR fyrir árið 2011. Einnig verða kjörnar bestu íþróttakonur og íþróttamenn allra deilda félagsins. Kjör þetta verður það 20. í röðinni og fer fram með viðhöfn í ÍR-heimilinu, 2.hæð.
Léttar veitingar verða í boði og eru allir velkomnir.
Við hvetjum ÍR-inga og aðra velunnara félagsins til þess að mæta og heiðra þetta frábæra íþróttafólk.

Frábær árangur hjá Helgu Maríu á Vetrarólympíuleikum ungmenna í Innsbruck

ÍR´ingurinn Helga María Vilhjálmsdóttir varð í 15 sæti í „Super Combined“ í dag á vetrarólympíuleikum ungmenna í Innsbruck í Austurríki. Á leikunum keppa um 1.000 íþróttamenn frá yfir 60 löndum í þeim 15 íþróttagreinum sem eru á dagskrá Vetrarólympíuleika. Ísland sendir þrjá keppendur á leikana. Hægt er að fylgjast með úrslitum á www.fisski.com og www.innsbruck2012.com

Street dans Brynju Péturs

Þann 16.janúar hefst Street dans námskeið Brynju Péturs. Hiphop, dancehall, House, Waacking, Break dans, ofl. Til að sjá nánari upplýsingar smellið á myndina.
Stundartafla og skráningar á http://brynjapeturs.is

ÍR Handbolti er málið 2.tbl. tímabilið 2011-2012 er komið út. Ert þú í blaðinu okkar ??

Vetrarstarf handknattleiksdeildar ÍR er nú hálfnað og seinni hluti tímabils farinn í fullt og  því er við hæfi að annað tölublað af " ÍR Handbolti er málið" fyrir tímabilið 2011-2012 komi út.  Við höldum áfram frá því þar sem frá var horfið í fyrsta tölublaði og förum yfir það helsta sem gerðist í október, nóvember og desember hjá yngri flokkum okkar.  Þessir krakkar eru til fyrirmyndir fyrir félagið og hverfið okkar sem við megum öll vera stolt af.
Tímaritið kemur áfram út sem "Interactive PDF " þannig að hægt er að smella á tákn og hlekki inn í blaðinu til að skoða nánar myndir, video eða annað sem tengist viðkomandi frétt á Facebook eða bloggi ÍR handbolta.

Interactive " Handbolti er málið" issuu opnast í nýjum glugga ef smellt er á blaðið hér 

Hafþór Harðarson keilari í 14.sæti

Hafþór Harðarson keilari úr ÍR varð í 14. sæti í kjöri til Íþróttamanns ársins 2011, þetta er fábær árangur og í fyrsta skipti sem einhver úr keilu fær stig í þessu kjöri.